GALICIA ESCENA PRO 2026

Dende ALÓproducións presentamos en Galicia Escena PRO 2026, o noso novo espectáculo: Less dragqueens and more ChuNorris! (Menos dragqueens and more ChuNorris!) do homoerectus ao homosapiens, nun axuste de contas á "machoesfera" con moito humor!

A estrea desta comedia protagonizada por Alberte Bello e Dani Blanco, dirixida por Afonso Becerra de Becerreá, terá lugar o 20 de setembro de 2026 ás 19.00H no Teatro Rosalía de Castro (A Coruña)

TEATRO / XÉNERO: COMEDIA / DURACIÓN: 70 min. IDIOMA: GALEGO / DESTINADO A: TODOS OS PÚBLICOS
Falamos? aloproducions@gmail.com (+34)662.405.777 @aloproducions

SINOPSE

Esta é unha comedia que ispe o home. Pero que ninguén bote as mans á cabeza! Ou si, á cabeza, porque o espido vai dar para rir, pero sobre todo para pensar.

Dani Blanco e Alberte Bello, creadores con moita rúa e pouco “macherío”, vístense e íspense coas galas das masculinidades varias, de varietés. Entre o circo e a comedia, este show é un axuste de contas á “machosfera” desde a retranca.

Unha revolución para examinar as masculinidades tóxicas e o sufrimento que causan. Humor e amor son os dous actores principais e queren contar contigo.

por que este espectáculo?

Violencia, dureza, forza, asertividade, dominación, sobriedade, orgullo, virilidade, importancia, seriedade, poder, antisentimentalismo, imperturbabilidade, ferocidade... Ten todo isto algo que ver coa masculinidade?

Se é así, entón que acontece cos seres que non actúan desde aí, senón que aturan iso? Se revisamos os patróns (e o patriarcado), poderemos mudalos?

Por que pode é necesario este espectáculo? Esta pregunta respóndese con estoutras:

QUE PASARÍA SE A MASCULINIDADE FOSE UNHA COMEDIA?

QUE PASARÍA SE FOSE UN CIRCO?

QUE PASARÍA SE FOSEN UNHAS RISAS?

QUE PASARÍA SE FOSE TEATRO?

SOBRE A TEMÁTICA

A masculinidade pode converterse nun valor segundo o cal podes valer máis ou menos. As accións da masculinidade poden subir ou baixar na “bolsa social”.

Que pasa cando, pola acción da “machoesfera” e os seus fregueses, o valor da masculinidade sobe e o da feminidade baixa? Como se mide a masculinidade nos homes e nas mulleres, e como nos afecta?

Historicamente, o xénero masculino hexemónico é dominante. Quizais non é tan importante ser “macho”. Aínda que hai un sector da mocidade que está preocupado por ser “home”, repetindo constantemente os patróns da masculinidade tóxica.

Parécenos importante descontracturar, relativizar, o humor relativiza a gravidade. O humor fainos conscientes de que a masculinidade é unha construción.

É a masculinidade algo que se deba impoñer? É unha bandeira que se ten que exhibir? É un valor? É unha proba que tes que pasar? Teñen os adolescentes que demostrar que son machos? É unha ideoloxía?

EQUIPA ARTÍSTICA E Técnica:

Dirección e Dramaturxia:

Afonso Becerra de Becerreá

En Escena:

Alberte Bello e Dani Blanco

Dirección de Movemento:

Estefanía Gómez

Espazo Escénico:

AlberteBello

Asistente de Espazo Escénico:

Noa Iriarte

Asistente de produción:

Ana G. Fernández

Deseño Gráfico e Imaxe:

Diego Seixo

Producen: ALÓproducións

Centro Dramático Galego

Distribución:

(+34) 662.405.777 aloproducions@gmail.com @aloproducions